ዜና

የሀገር ውስጥ ዜና

በኢትዮጵያና በፈረንሳይ መንግስታት መካከል በትምህርት መስክ ያለው የሁለትዮሽ ግንኙነት እየተጠናከረ መምጣቱን የፈረንሳይ እና የአውሮፓ ውጭ ጉዳይ ሚኒስትር ጂያን ኖኤል ባሮት አስታወቁ፡፡

ሁለቱ አገሮች በሊሴ ገብረማርያም ትምህርት ቤት አስር በመቶ ነጻ የትምህርት እድል የሚያስገኝ የመግባቢያ ሰነድ ተፈራርመዋል፡፡

የፈረንሳይ የውጭ ጉዳይ ሚኒስትር ጂያን ኖኤል ባሮት ከትምህርት ሚኒሰትሩ ፕሮፌሰር ብርሃኑ ነጋ ጋር የስምምነት ሰነድ በተፈራረሙበት ወቅት እንደገለጹት እ.ኤ.አ. በ1947 የተመሰረተው የሊሴ ገብረማርያም ትምህርት ቤት በኢትዮጵያና በፈረንሳይ መካከል በትምህርት መስክ ያለው የቆየ ወዳጅነትና ትብብር ማሳያ ነው፡፡

የሊሴ ገ/ማርያም ትምህርት ቤት በ77 ዓመታት ታሪኩ በርካታ ኢትዮጵያውያንን ማሰልጠኑን የገለጹት ውጭ ጉዳይ ሚኒስትሩ የተፈረመው ስምምነትም በሁለቱ አገራት መካከል በትምህርት መስክ ያለውን መተማመንና ትብብር ከፍ እንደሚያደርገው ተናግረዋል፡፡

ስምምነቱ እውን እንዲሆን የትምህርት ሚኒስትሩ ፕሮፌሰር ብርሃኑ ነጋ ላደረጉት ትጋትና አስተዋጽኦም የፈረንሳዩ ውጭ ጉዳይ ሚኒስትር ምስጋና አቅርበዋል፡፡

የትምህርት ሚኒስትሩ ፕሮፌሰር ብርሃኑ ነጋ በበኩላቸው ትምህርትን በጥራትና በፍትሀዊነት ለማድረስ እየተሰራ መሆኑን ጠቁመው በስምምነቱ መሠረት በሊሴ ገብረማርያም ትምህርት ቤት ከፍለው መማር ከማይችሉ ቤተሰቦች የሚገኙ ተማሪዎችን በመለየት እስከ አስር በመቶ የሚደርስ ነጻ የትምህርት እድል እንደሚሰጥ ተናግረዋል፡፡

በኢትዮጵያ እንደ ሊሴ ገ/ማርያም ባሉ ትምህርት ቤቶች ከፍለው ማስተማር የማይችሉ ቤተሰቦችን ልጆች ተቀብለው ጥራት ያለው ትምህርት ለመስጠት የሚያስችል ስራ እየተሰራ መሆኑን ገልጸው ይህም የበለጠ ዴሞክራሲያዊ እና የተረጋጋ ማህበረሰብን ለመፍጠር እንደሚያስችል ጠቁመዋል።

በኢትዮጵያና በፈረንሳይ መካከል በሊሴ ገ/ማርያም ትምህርት ቤት አማካኝነት ጠንካራ ወዳጅነትና የትብብር ግንኙነት መኖሩን የጠቆሙት ሚኒስትሩ ሰምምነቱ የነበረውን ወዳጅነትና ትብብር የበለጠ እንደሚያጠናክረው ገልጸዋል፡፡

ከመግባቢያ ስምምነቱ አስቀድሞም የፈረንሳይና አውሮፓ ውጭ ጉዳይ ሚኒስትር ጂያን ኖኤል ባሮት እና የኢፌዲሪ የትምህርት ሚኒስትር ፕሮፌሰር ብርሃኑ ነጋ በትምህርት ቤቱ ተዘዋውረው ጉብኝት አድርገዋል፡፡

በስምምነቱ ወቅት የአጠቃላይ ትምህርት ልማት ዘርፍ ሚኒስተር ዴኤታ ክብርት ወ/ሮ አየለች እሸቴ እና በኢትዮጵያ የፈረንሳይ አምባሳደር ሚስተር አሌክሲስ ማሌክን ጨምሮ ሌሎችም የሚመለከታቸው ኃላፊዎች ተገኝተዋል።

Nov 30, 2024 80

የሀገር ውስጥ ዜና

2ኛ ደረጃ ተማሪዎች ውጤት እንዲሻሻልና ከትምህርት ገበታ ውጪ የሆኑ ተማሪዎች ወደ ትምህርት ቤት እንዲመለሱ በትኩረት መሥራት እንደሚገባ ተገለፀ።

ትምህርት ሚኒስቴር በ12ኛ ክፍል የማጠናከሪያ ትምህርትና በተማሪዎች ቅበላ ዙሪያ ከክልልና ከተማ መስተዳድሮች ትምህርት ቢሮ ሃላፊዎች ጋር በበይነ መረብ ውይይት አድርጓል።

በበይነ መረብ ውይይቱ የማጠናከሪያ ትምህርትን እንዲሁም ከትምህርት ገበታ ውጪ የሆኑ ተማሪዎችን በሚመለከት የተዘጋጀ ሰነድ ቀርቦ ሰፊ ውይይት ተደርጎበታል።

በትምህርት ሚኒስቴር የአጠቃላይ ትምህርት ልማት ዘርፍ ሚኒስትር ዴኤታ ክብርት ወ/ሮ አየለች እሸቴ በውይይቱ ወቅት እንደገለጹት የ2ኛ ደረጃ ተማሪዎች ውጤትን ለመሻሻል የዘርፉ አመራሮችና ባለድርሻ አካለት ሚና ከፍተኛ መሆኑን ገልጸዋል።

ክብርት ወ/ሮ አየለች አክለውም መምህራን፣ የትምህርት ቤት አመራሮችና ወላጆች ተማሪዎችን በስነልቦና ዝግጁ የማድረግ ሚናቸውን እንዲወጡ አሳስበዋል። ከተማሪዎች ቅበላ አኳያም ከትምህርት ገበታ ውጪ የሆኑ ተማሪዎች ወደ ትምህርት ቤት እንዲመጡ በትኩረት መሥራት እንደሚገባ ጠቁመው በየደረጃው ያለው የትምህርት አመራር የሚፈለገው ለውጥ እንዲመጣና ስራዎች በተቀመጠላቸው የጊዜ ሠሌዳ መሠረት እንዲጠናቀቁ በቁርጠኝነትና በጥብቅ ዲሲፕሊን መምራት እንደሚገባም አስገንዝበዋል።

በበይነ መረብ ውይይቱ የተሳተፉ የክልል ትምህርት ቢሮ ሃላፊዎች የትምህርት ጥራትን ለማስጠበቅ የ2ኛ ደረጃ የማጠናከሪያ ትምህርት ዕቅድ አውጥቶ ወጥ በሆነ ሁኔታ መሥራት ተገቢ እንደሆነ ገልጸው የታሰበውን ውጤት ለማምጣት ርብርብ ለማድረግ ቁርጠኛ እንደሆኑ ጠቁመዋል።

የትምህርት ቢሮዎቹ አመራሮች በመጨረሻም ከትምህርት ገበታ ውጭ የሆኑ ተማሪዎችን ወደ ትምህርት ቤት ለመመለስ በትኩረት እንደሚሰሩ ገልጸዋል።

Nov 30, 2024 69

የሀገር ውስጥ ዜና

በትምህርት ቤቶች መካከል እየተካሄደ ያለው የትምህርት ቤቶች ስፖርት ሊግ ውድድር ቀጥሎ በድሬዳዋ ከተማ አስተዳደርና በአፋር ክልል ትምህርት ቤቶችም በድምቀት ተጀመሯል።

ትምህርት ሚኒስቴር ከሁሉም ክልሎችና ከተማ መስተዳድሮች የትምህርት ቢሮዎች ጋር በመተባበር የትምህርት ቤቶች ስፖርት ሊግን በተለያዩ ክልሎች እያስጀመረ ይገኛል።

በዚህም የትምህርት ቤቶች ስፖርት ሊግ በድሬዳዋ ከተማ አስተዳደርና በአፋር ክልል ትምህርት ቤቶች በድምቀት ተጀመሯል።

ትምህርት ሚኒስቴር የተማሪዎችን ስፖርት ተሳታፊነትንና ተጠቃሚነትን ለማረጋገጥ በሁሉም ሀገሪቱ ክፍሎች እንደ ተማሪዎቹ ዕድሜ አካላዊና አዕምሯዊ ዕድገት እንዲሁም የክፍል ደረጃ ታሳቢ ያደረገ ከትምህርት ሰዓት ውጪ ስፖርታዊ ውድድሮችንና ፌስቲቫሎችን ለማስፋት የሚያስችል የትምህርት ቤቶች ሊግ ስፖርታዊ ውድድር ተግባራዊ እያደረገ ይገኛል።

ይህም ተማሪዎች ሁለንተናዊ ዕድገት እንዲያመጡ ብሎም ለሀገራችን ተተኪ ስፖርተኞችን ለማውጣት ዘርፈ ብዙ ጠቀሚታዎች ይኖሩታል ተብሎ ይገመታል፡፡

በዚህም የትምህርት ቤቶች ስፖርት ሊግ ውድድሮች በምስራቅ ቀጣና የድሬዳዋ ከተማ አስተዳደር በሁሉም መንግስታዊና መንግስታዊ ያልሆኑ ትምህርት ቤቶች በቮሊቦል፣ እግር ኳስ፣ እጅ ኳስ፣ ጂምናስቲክስ፣ ጠረዼዛ ቴኒስ፣ ቼስ እና በባህል ስፖርቶች ውድድሮች በትምህርት ቤት ደረጃ በድምቀት በማስጀመር ውድድሮች መካሄድ ጀምረዋል።

በሌላ በኩል በአፋር ክልል በዞን 2 በራህሌና በዞን 3 ዱሌቻ ወረዳዎች የሚገኘኙ ትምህርት ቤቶች በእግር ኳስ ስፖርት ውድድር የጀመሩ ሲሆን በቀጣይም ሌሎች ክልሎች የትምህርት ቤቶችን ስፖርት ውድድር እንደሚጀምሩና እንደሚያስቀጥሉ ይጠበቃል፡፡

በዚህም የትምህርት ቤቶች ስፖርት ሊግ በድሬዳዋ ከተማ አስተዳደርና በአፋር ክልል ትምህርት ቤቶች በድምቀት ተጀመሯል።

Nov 26, 2024 109

የሀገር ውስጥ ዜና

የእጅ መታጠብና የንጽህናን አጠባበቅ ልምምዶችን በትምህርት ቤቶች ማስተማር የበሽታዎችን ስርጭትና የተማሪዎችን ከትምህርት ቤት መቅረት እንደሚቀንስ ተገለጸ።

ዓለም አቀፍ የእጅ መታጠብ እና የመጸዳጃ ቤት ቀን በአለርት ኮምፕሬሄንሲቭ ስፔሻላይዝድ ሆስፒታል በአገር አቀፍ ደረጃ ተከብሯል፡፡

በኢትዮጵያ የ” WASH” ዩኒሴፍ ኃላፊ ቪክቶር ኪኒያንጆይ በዚሁ ወቅት እንደገለጹት እጅን በአግባቡ መታጠብና ንጽህናን መጠበቅ በሽታን ከመከላከል ባሻገር ከትምህርት ቤት የመቅረት ምጣኔን ይቀንሳል ብለዋል፡፡ አክለውም በመጀመሪያ ደረጃ እና ሁለተኛ ደረጃ ትምህርት ቤቶች እጅ የመታጠብና የንጽህና አጠባበቅ የእለት ተዕለት ልምምድና ተግባር ሊሆን እንደሚገባ ጠቁመዋል፡፡

ዩኒሴፍ የትምህርት ቤቶች የንጽህና አጠባበቅ የስርዓተ ትምህርት አካል መሆን አለበት ብሎ እንደሚያምንም የ” WASH” ዩኒሴፍ ኃላፊ ቪክቶር ኪኒያንጆይ አስረድተዋል፡፡

የጤና ሚኒስቴር ዴኤታው ዶክተር ደረጀ ዱጉማ በበኩላቸው እጅ በመታጠብ ብቻ በአገራችን ህጻናት፣ ተማሪዎችን እንዲሁም ወጣቶችና አዋቂዎችን በየጊዜው የሚያጠቁ ጉንፋንና መሰል የመተንፈሻ አካላት በሽታዎችን በ1/3ኛ መቀነስ እንደሚቻል ጠቁመዋል፡፡

በወሳኝ ጊዜያት እጅን በውሃና በሳሙና መታጠብ ተቅማጥና ተያያዥ በሽታዎችን እስከ 50 በመቶ እንደሚቀንስ የጠቆሙት ዶ/ር ደረጀ በተገቢው ጊዜ እጅ በመታጠብና የመጸዳጃ ቤት አጠቃቀምን በማሻሻል ጤናማ ለአገር ብልጽግና የራሱን ሃላፊነትና ድርሻ የሚወጣ ማህበረሰብ መፍጠር እንደሚገባ ተናግረዋል፡፡

የውሃና ኤነርጂ ሚኒስትር ዴኤታው አምባሳደር ዶ/ር አስፋው ዴንጋሞ በበኩላቸው መጸዳጃ ቤቶችን በአግባቡ የመጠቀም ፣ እጅን የመታጠብና ንጽህናን የመጠበቅ ባህልን ማሳደግ እንደሚገባ ጠቁመዋል።

በትምህርት ሚኒስቴር ከፍተኛ የውሃ አቅርቦት ስፔሺሊስትና ዎሽ አስተባባሪ የሆኑት ወ/ሮ ሉዓም አበበ በበኩላቸው በትምህርት ቤቶች ላይ ንጹህ ውሃ አቅርቦትና ሳኒቴሽን ሀይጂን መሰረተ ልማት በመገንባት ተማሪዎችን ተጠቃሚ ለማድረግ እየተሰራ መሆኑን ገልጸዋል፡፡

እጅን በውሃና በሳሙና በመታጠብና የመጸደጃ ቤት አጠቃቀምን በማሻሻል ከንጽህና ጉድለት የሚመጡ በሽታዎችን በመከላከል ተማሪዎችን ከትምህርት ቤት እንዳይቀሩ ማድረግ እንደሚገባም ወ/ሮ ሉዋም ተናግረዋል፡፡

የእጅ መታጠብ ቀን “ንጹህ እጆች ለጤናችን ዋስትና ናቸው” በሚል መሪ ቃል በዓለም ዓቀፍ ደረጃ ለ16ኛ ጊዜ በኢትዮጵያ ደረጃ ደግሞ ለ15ኛ ጊዜ የመጸዳጃ ቤት ቀን ደግሞ “መጸዳጃ ቤትን በንጽህና መያዝና መጠቀም ዘመናዊነት ነው “ በሚል ቃል በዓለም ለ11ኛ ጊዜ ፣ በአገራችን ደግሞ ለ8ኛ ጊዜ በዕለቱ መከበሩ ታውቋል፡፡

Nov 23, 2024 101

የሀገር ውስጥ ዜና

በትምህርት ዘርፍ እየታዩ ያሉት ለውጦች ተጠናክረው መቀጠል እንዳለባቸው ተጠቆመ።

የትምህርት ሚኒስቴር ሰራተኞች የለውጡ መንግስት ባሳካቸውን የልማት ስኬቶችና በነበሩ ተግዳሮቶች ዙሪያ ውይይት አድርገዋል። “የህልም ጉልበት ፣ ለእምርታዊ እድገት” በሚል ርዕስ ሰነድ ቀርቦ ሰፊ ውይይት ተደርጎበታል።

በውይይት መድረኩ የተገኙት የአጠቃላይ ትምህርት ልማት ዘርፍ ሚኒስትር ዴኤታ ክብርት ወ/ሮ አየለች እሸቴ ይህ የውይይት መድረክ ለውጡ ያሳካናቸውን ስኬቶች ይዘን የነበሩብንን ተግዳሮቶች ለይተን ልዩ ርብርብ ለማድረግ ያግዛል ብለዋል።

ክብርት ወ/ሮ አየለች አክለውም እንደ ትምህርት ማህበረሰብ ሚናችንና የነበሩ ተግዳሮቶችን ለይተን በትኩረት ከሰራን በቀጣይ ለሀገራችንና ለህዝባችን ምንዳን ማምጣት እንችላለን ብለዋል። ስራዎቻችን በአጭርና በረጅም ጊዜ አቅደን ከሰራን አኩሪ ስኬቶችን ለማህበረሰባችን ማድረስ እንደሚቻል መገንዘብ ተገቢ መሆኑን ገልጸዋል።

የከፍተኛ ትምህርት ልማት ዘርፍ ሚኒስትር ዴኤታ ክቡር አቶ ኮራ ጡሽኔ በበኩላቸው በትምህርት ዘርፉ በርካታ ስኬቶች የተመዘገቡ ቢሆንም እስካሁን ያልተሻገርናቸውና ትኩረት የሚሹ ስብራቶች መኖራቸውን ጠቅሰው ትምህርትን እንደሚመራ ተቋም እነዚህን ስብራቶች በአግባቡ ማሻሻል ካልቻልን ተወቃሽ እንሆናለን ብለዋል።

በትምህርትና ስልጠና ባለስልጣን ምክትል ዋና ዳይሬክተር የሆኑት አቶ ቢኒያም ኤሮ የእለቱን የመወያያ አጀንዳ ያቀረቡ ሲሆን ከሰራተኞች ለተነሱ ጥያቄዎችም ምላሽ ሰጥተዋል።

Nov 22, 2024 93

የሀገር ውስጥ ዜና

የአውሮፓ ህብረት ERASMUS+ የትምህርትና ስልጠና ደጋፍና ትብብር አሰጣጥን አስመልክቶ ውይይት ተደረገ፡፡

የመረጃ ልውውጡ የአውሮፓ ህብረት በትምህርትና ስልጠና የሚሰጣቸውን ድጋፎች አሟጦ ለመጠቀም እንዲቻል ታስቦ የተዘጋጀ መሆኑ ተገልጿል።

በመርሃ ግብሩ ላይ የተገኙት የከፍኛ ትምህርት ልማት ዘርፍ ሚኒስትር ዴኤታ ክቡር አቶ ኮራ ጡሹኔ ባስተላለፉት መልዕክት የአውሮፓ ህብረት በ “ERASMUS+” የትምህርትና ስልጠና ድጋፍና ትብብር እያደረገ ላለው ድጋፍ ምስጋናቸውን አቅርበዋል።

መስል ድጋፎችና ትብብሮች የከፍተኛ ትምህርት ተቋማትን አቅም ከመገንባትና አለም አቀፍ ትብብርን ከማሳደግ አኳያ ሚናቸው ከፍተኛ በመሆኑ የሚገኙ እድሎችን አሟጦ መጠቀም እንደሚገባ ሚንስትር ዴኤታው አስገንዝበዋል።

የአውሮፓ ህብረት በኢትጵያ አምባሳደር ሆነው የተሰየሙት ክብርት ሶፊ ፍሮም ኤምስበርገር በበኩላቸው የአውሮፓ ህብረት ከዚህ ቀደም ለ650 ያህል ኢትዮጵያውን የነጻ ትምህርት እድል የሰጠ መሆኑን በመጥቀስ ድጋፉ ተጠናክሮ እንደሚቀጠል ገልጸዋል፡፡

በትምህርት ሚኒስቴር የአካዳሚክ ጉዳዮች መሪ ስራ አስፈጻሚ ዶ/ር ኤባ ሚጀና በበኩላቸው መሰል ድጋፎችና ትብብሮች የከፍተኛ ትምህርት ዘርፉን አቅም በመገንባት ረገድ በሚኖራቸው ፋይዳ ላይ ሠፊ ገለጻ አድርገዋል።

መርሃ ግብሩን የከፍተኛ ትምህርት ተቋማትና ሌሎች ባለድርሻ አካላት በበይነ መረብ ጭምር ታድመውታል፡፡

Nov 22, 2024 90

የሀገር ውስጥ ዜና

በከፍተኛ ትምህርት ተቋማት በብቃት ላይ የተመሠረተ አመራር እንዲኖር እየተሰራ መሆኑን የትምህርት ሚኒስትሩ ፕሮፌሰር ብርሃኑ ነጋ አስታወቁ፡፡

ትምህርት ሚኒስቴርና የአፍሪካ አመራር ልህቀት አካዳሚ በጋራ መስራት የሚያስችላቸውን የመግባቢያ ሰነድ ተፈራርመዋል፡፡

የትምህርት ሚኒስትሩ ፕሮፌሰር ብርሃኑ ነጋ በስምምነቱ ወቅት እንደገለጹት በከፍተኛ ትምህርት ተቋማት የአመራሮች ምደባ ብቃትን መሰረት ያደረገ እንዲሆን እየተሰራ መሆኑን ተናግረዋል፡፡

የአንድ አገር ልማትና ስኬት የሚወሰነው በዋነኛነት በየደረጃው ባሉ መዋቅሮች ላይ በሚያገለግሉ አመራሮች ብቃት መሆኑን ሚኒስትሩ አስረድተዋል፡፡

ከአፍሪካ የአመራር ልህቀት አካዳሚ ጋር የተፈረመው የመግባቢያ ሰነድም ውጤታማ አመራርን ለማፍራትም ሆነ ሀብትን በውጤታማነትና በአግባቡ ለመጠቀም ምቹ ሁኔታን እንደሚፈጥርም ጠቅሰዋል፡

የአፍሪከ አመራር ልህቀት አካዳሚ ፕሬዚዳንት አቶ ዛዲግ አብርሃ በበኩላቸው ጠንካራ አመራር ለመፍጠር ግልጽ የአመራር ልማት ፖሊሲ፣ በስልጠናው የሚለይ የአመራር ልማት ፕሮግራም እንዲሁም ሳይንሳዊ የአመራር ምዘና ስርዓት ወሳኝ መሆኑን ጠቁመዋል፡፡

ከትምህርት ሚኒስቴር ጋር ዛሬ የተፈረመው የመግባቢያ ሰነድም በከፍተኛ ትምህርት ተቋማት የተሟላ ብቃት ያለውና ቁርጠኛ አመራር በመፍጠር የተጀመሩ የሪፎርምና የለውጥ ስራዎች በታሰበው መንገድ ለውጤት እንዲበቁና ስኬተማ እንዲሆኑ እንደሚያስችል አስረድተዋል፡፡

ደረጃውን የጠበቀ አገር በቀል ስልጠና መኖሩ አገሪቱ የምትፈልገውን አመራር በብዛትና በብቃት ለማፍራት ከማሰቻሉም ባሻገር አመራሮችን በውጭ አገር በማሰልጠን የሚወጣውን ከፍተኛ ወጪ ለማስቀረት እንደሚያግዝም አቶ ዛዲግ አብራርተዋል፡፡

የስምምነት ሰነዱን ትምህርት ሚኒስቴርን በመወከል የከፍተኛ ትምህርት ልማት ዘርፍ ሚኒስትር ደኤታ አቶ ኮራ ጡሹኔ እንዲሁም የአፍሪካ አመራር ልህቀት አካዳሚን በመወከል ደግሞ የአካዳሚው ምክትል ርእሰ አካዳሚ ወ/ሮ መሠረት ደስታ ፈርመዋል፡፡

ትምህርት ሚኒስቴርና የአፍሪካ አመራር ልህቀት አካዳሚ በጋራ መስራት የሚያስችላቸውን የመግባቢያ ሰነድ ተፈራርመዋል፡፡

Nov 20, 2024 101

የሀገር ውስጥ ዜና

ሀንጋሪ ከኢትዮጵያ ጋር በትምህርት ዘርፍ ያላትን የትብብር ግንኙነት ለማሳደግ እየሰራች መሆኑ ተጠቆመ።

የሀንጋሪ ሪፐብሊክና የኢፌዲሪ የትምህርት ሚኒስቴር ለመቶ ኢትዮጵያውያን ነጻ የትምህርት እድል የሚያስገኝ የመግባቢያ ሰነድ ተፈራርመዋል፡፡

የትምህርት ሚኒስቴር የከፍተኛ ትምህርተ ልማት ዘርፍ ሚኒስትር ዴኤታ አቶ ኮራ ጡሹኔ ስምምነቱን በተፈራረሙበት ወቅት እንደገለጹት ሀንጋሪ ከኢትዮጵያ ጋር ባላት የረጅም ጊዜ ታረካዊ ግንኙነት በትምህርቱ መስክ በቅድመ ምረቃ፣ በድህረ ምረቃ እና በፒ ኤች ዲ መርሐ-ግብሮች ለበርካታ ኢትዮጵያውያን ነጻ የትምህርት እድል ስትሰጥ መቆየቷን አመልክተዋል፡፡

በሁለቱ ሀገራት መካከል በተፈረመው የመግባቢያ ስምምነት መሰረትም አገሪቱ በየዓመቱ ለ100 ኢትዮጵያውያን ነጻ የትምህርት እድል ለመስጠት መዘጋጀቷንና ይህም በሁለቱ ሀገራት መካከል ያለውን የትምህርትና የዩኒቨርስቲ ለዩኒቨርስቲ ግንኙነት የበለጠ እንደሚያጠናክረው ተናግረዋል፡፡

በኢትዮጵያ የሀንጋሪ ሪፐብሊክ አምባሳደር ሚስተር አቲላ ኮፓኒ በበኩላቸው በሁለቱ ሀገራት መካከል በትምህርት ዘርፍ የቆየ የትብብርና የወዳጅነት ግንኙነት መኖሩን ጠቁመው በትምህርቱ ዘርፍ ዛሬ የተፈረመው ስምምነት የሁለቱን አገራት ግንኙነትን ይበልጥ እንደሚያጎለብተው ተናግረዋል፡፡

ሀንጋሪ ለኢትዮጵያ ነጻ የትምህርት እድል ስትሰጥ የመጀመሪያ አለመሆኑን የጠቆሙት አምባሳደሩ ዛሬ በተፈረመው የስምምነት ሰነድ ዋነኛ ኣላማም ሀገሪቱ እ. ኤ. አ. ከ2017 ጀምሮ ለ50 ተማሪዎች በሁለተኛና በሦስተኛ ዲግሪ ስትሰጥ የነበረውን ነጻ የትምህርት እድል እ.አ.አ. ከ2025 ጀምሮ ወደ 100 ለማሳደግ ያለመ መሆኑን ተናግረዋል፡፡

ሀገሪቱ ለኢትዮጵያ የምትሰጠውን ነጻ የትምህርት እድል በእጥፍ ለማሳደግ የወሰነችው የሀገሪቱ የውጭ ጉዳይ ሚኒስትር እ.ኤ.አ. በ2023 በኢትዮጵያ ያደረጉትን ጉብኝት ተከትሎ መሆኑንም አምባሳደር አቲላ ኮፓኒ ጨምረው አብራርተዋል፡፡

በመግባቢያ ስምምነት ሰነዱ የፊርማ ስነ ስርዓት ላይም የሁለቱም ወገኖች የሚመከታቸው የስራ ኃላፊዎች ተገኝተዋል፡፡

Nov 19, 2024 72

የሀገር ውስጥ ዜና

የትምህርት ቤቶች ስፖርት ሊግ ተጀመረ።

ትምህርት ሚኒስቴር ከሁሉም ክልሎችና ከተማ መስተዳድሮች የትምህርት ቢሮዎች ጋር በመተባበር የትምህርት ቤቶች ስፖርት ሊግን አስጀምሯል።

ተማሪዎች መደበኛ የትምህርት ጊዜያቸውን ሳይጎዱ በስፖርታዊ እንቅስቃሴዎች ላይ ተሳትፎ እንዲያደርጉ የስፖርት ሊግ መርሃ ግብሩ ተዘጋጅቶ ወደተግባር ገብቷል። የተማሪዎች ከመደበኛ ትምህርትቸው ጎን ለጎን በተለያዩ ስፖርታዊ እንቅስቃሴዎች መሳተፍ የተማሪዎችን አካላዊ፣ ማህበራዊ፣ ስነ ልቦናዊ ጠቀሜታው የጎላ ነው።

ከዚህ አኳያም በ2017 የትምህርት ዘመን በምስራቅ ቀጣና የተደራጀው የሀረሪ ክልል በሁሉም ትምህርት ቤቶች በቮሊቦል፣ በእግር ኳስ፣ በቅርጫት ኳስ፣ በእጅ ኳስ፣ በአትሌትክስ፣ በጂምናስቲክስ፣ በጠረዼዛ ኳስ እና በባህላዊ ስፖርት አይነቶች የክልሉ አመራሮች ፣ የሀይማኖት አባቶች፣ ታዋቂ ግለሰቦችና የትምህርት ቤት አመራሮች በተገኙበት በልዩ ልዩ ዝግጅቶች በድምቀትተከፍቷል።

ስፖርታዊ ውድድሩ አመቱን ሙሉ የሚቀጥል ሲሆን ከሀረሪ ክልል በተጨማሪም የድሬዳዋ ከተማ አስተዳደር ሁሉም ባለ ድርሻ አካላት በተገኙበት የማስጀመሪያ መድረክ ተዘጋጅቶ ወደ ትግበራ ገብቷል፡፡

በሌሎች የሀገራችን ክፍሎች ደግሞ በደቡብ ቀጣና ከሚገኙ ትምህርት ቤቶች ውስጥ በደቡብ ኢትዮጵያ በጋሞ ዞንና በደቡብ ኦሞ ዞን የሚገኙ ትምህርት ቤቶች በቮሊቦልና በእግር ኳስ እንዲሁም በኦሮሚያ ክልል በጉጂ ዞን የሚገኙ ትምህርት ቤቶች በእግር ኳስ ፣ በቮሊቦል እና በአትሌትክስ ስፖርት በደመቀ ሁኔታ ተጀምሯል፡፡

በሌሎች የቀጣና አደረጃጀቶች ስር የሚገኙ ትምህርት ቤቶች ስፖርታዊ ውድድሮቹን በቅርቡ የሚያስጀምሩ ይሆናል።

Nov 18, 2024 73

የሀገር ውስጥ ዜና

9ኛው የሳይንስና ምህድስና የመምህራንና የተማሪዎች የፈጠራ ሥራ ውድድር አውደ ርዕይ ተጠናቀቀ።

በትምህርት ሚኒስቴር አዘጋጅነት በአዲስ አበባ ሳይንስና ቴክኖሎጂ ዩኒቨርሲቲ ሲካሄድ የነበረው 9ኛው የሳይንስና ምህድስና ዘርፎች የመምህራና የተማሪዎች የፈጠራ ሥራ ውድድር አውደ ርዕይ በዛሬው እለት ተጠናቋል።

በመርሃ ግብሩ ማጠቃለያ ላይ የተገኙት በትምህርት ሚኒስቴር የመምህራና ትምህርት ቤት አመራር ልማት መሪ ሥራ አስፈጻሚ ሙሉቀን ንጋቱ(ዶ/ር) የመምህራንና የተማሪዎች ሥራ ፈጠራ ውድድር አውደ ርዕይ ለየት ያለ የፈጠራ ችሎታ ያላቸው ተማሪዎችና መምህራን የፈጠራ ሀሳባቸውን ለሌሎች አካፍለው ድጋፍና ግብዓት የሚያሰባስቡበት መድረክ እንደነበር ገልጸዋል።

ዶ/ር ሙሉቀን አክለውም በዚህ አውደ ርዕይ የተሳተፉና የተወዳደሩ ተማሪዎችና መምህራን ይህ የመጨረሻቸው ግብ አለመሆኑን አውቀው እንደ ማስፈጠሪያ በመጠቀም ወደፊት በፈጠራ ሥራቸው ራሳቸውንና ሀገርን ወደ ሚጠቅሙበት ደረጃ እንዲደርሱ ጠንክረው መስራት እንደሚገባቸውም አሳስበዋል።

በሌላ በኩል በመድረኩ ተገኝቶ ልምዱን ያካፈለው ተማሪ እና ሥራ ፈጣሪ የሆነው ኢዘዲን ካሚል በበኩሉ ተማሪዎች በአውደ ርዕይ ተወዳድሮ ማሸነፍ ብቻ ሳይሆን በቀጣይ የፈጠራ ሀሳባቸውን ወደ ቢዝነስና ህብረተሰቡን መቀየር ወደ ሚችሉበት አገልግሎትና ምርት መሸጋገር የሚችሉበትን ማሰብና ለዛም ጠንክሮ መስራት እንምደሚጠበቅባቸው ተናግሯል።

ተማሪ ኢዘዲን ከዚህ ቀደም በ2010 እና 2011 ዓ.ም በተካሄደው የሳይንስና ምህድስና የፈጠራ ሥራ ውድድር ላይ በተከታታይ ተሸላሚ እንደነበር ጠቅሶ በአሁኑ ወቅት በቱርክ በሚገኝ ዩኒቨርሲቲ የ3ኛ አመት የሶፍት ዌር ኢንጂነሪግ ተማሪ መሆኑን ገልጿል። ከትምህርቱም ጎን ለጎን በፈጠራ ሥራው የራሱን ድርጅት በማቁቋም ከራሱ አልፎ ለሌሎች የሥራ እድል በመፍጠር የተለያዩ ሥራዎችን እየሰራ መሆኑም ተናግሯል።

ተማሪ ኢዘዲን አክሎም በዚህ አውደ ርዕይ በቀረቡ የፈጠራ ሥራዎች መደነቁን በመግለጽ ወደፊት በርካታ ሥራ ፈጣሪ የሆኑ ወጣቶች እንደሚፈጠሩ ያለውን እምነት ገልጿል።

በፈጠራ ሥራ ውድድር አውደ ርዕይ ላይ በተለያዩ ዘርፎች ተወዳድረው ለአሸነፉ መምህራንና ተማሪዎች የተለያዩ ሽልማቶች ተበርክቶላቸዋል።

ይህ 9ኛው የሳይንስና ምህድስና የመምህራንና ተማሪዎች የፈጣራ ሥራ ውድድር አውደ ርዕይ ትምህርት ሚኒስቴር ከስቴም ፓዎር፣ ስቴም ሲነርጂ፣ ጃይካ፣ ኢጁኬሽን ፎር ኢትዮጵያ እንዲሁም ከአዲስ አበባ ሳይንስና ቴክኖሎጂ ዩኒቨርሲቲ ጋር በመተባበር ያዘጋጀው መሆኑ ይታወቃል።

Nov 15, 2024 64

የሀገር ውስጥ ዜና

አገር አቀፍ አመታዊ የሳይንስ ትርኢትና ውድድር ተጠናክሮ መቀጠል እንዳለበት ተገለጸ

ትምህርት ሚኒስቴር በየአመቱ በህዳር ወር የሚከበረውን የአለም አቀፍ የሳይንስ ቀንን ምክንያት በማድረግ ከተለያዩ ባለድርሻ አካላት ጋር በመተባበር በአዲስ አበባ ሳይንስና ቴክኖሎጂ ዩኒቨርሲቲ ከህዳር 3-6/2017 ዓ.ም የተማሪዎችና መምህራን የፈጠራ ስራዎች አውደርዕይ እና ውድድር አካሂዷል፡፡

በትምህርት ሚኒስቴር የሂሳብ፣ሳይንስና ሥነ-ጥበብ ዴስክ ኃላፊ አቶ ታደሰ ተሬሳ በአውደ ርዕዩና በውድድሩ ላይ የተሳተፉት በሳይንስ ትምህርቶች ለየት ያለ ተሰጥኦ ያላቸው ተማሪዎችና መምህራን መሆናቸው ገልጸው ወደ ውድድሩ የመጡት በየክልሎቻቸውና በከተማ መስተዳድሮች ተመርጠው መሆኑን ተናግረዋል።

አቶ ታደሰ አያይዘውም አውደርዕዩና ውድድሩ በስምንት ዘርፎች መከናወኑንና በአጠቃላይ 124 ተማሪዎችና 20 መምህራን እንደተሳተፉ ጠቅሰው የፈጠራ ሥራዎችን ለማሳደግ የመምህራን ብቃትን ማሳደግ ወሳኝ በመሆኑ ይህንን ለማሳካት ሚኒስቴር መ/ቤቱ የአቅም ግንባታ ሥራዎች ላይ በትኩረት እየሰራ መሆኑን አንስተዋል፡፡

በትምህርት ሚኒስቴር በከፍተኛ ትምህርት ልማት ዘርፍ የማህበረሰብ ጉድኝትና ሀገር በቀል ዕወቀት ዴስክ ኃላፊ ወ/ሮ ሰላማዊት አለሙ በበኩላቸው መድረኩ የተማሪዎችን የፈጠራ ችሎታ እና የሳይንስና ምህንድስና ሙያ ፍላጎት እንዲያድግ በማድረግ ህብረተሰቡ ከሳይንስና ቴክኖሎጂ የሚያገኘው አበርክቶ ከጊዜ ወደ ጊዜ ከፍ እንዲል ምቹ ሁኔታን የሚፈጥር መሆኑን ጠቅሰዋል፡፡

ወ/ሮ ሰላማዊት መድረኩ ተማሪዎች የሚያጋጥሟቸውን ተግዳሮቶች በሳይንሳዊ ዘዴ የመፍታት አቅም እንዲያዳብሩ፣እርስ በርስ እንዲማማሩ፣ የሰሯቸውን የፈጠራ ሥራዎች ይበልጥ እንዲዳብሩና የገበያ ትስስር እንዲያገኙ ከአጋርና ባለድርሻ አካላት ጋር እንዲተዋወቁ የሚያደርግ መሆኑን ጠቁመዋል።

በማጠናቀቂያው በሰምንቱም ዘርፎች ከ1ኛ እስከ 3ኛ ለወጡ ተወዳዳሪዎች የማበረታቻ ሽልማቶች ተሰተዋል፡፡

መድረኩንም በትብብር ያዘጋጁት ትምህርት ሚኒስቴር፣አዲስ አበባ ሳይንስና ቴክኖሎጂ ዩኒቨርሲቲ፣አገር አቀፍ ስቴም ፓወር፣ አገር አቀፍ ስቴም ሲነርጂ፣ጃይካ እና ትምህርት ለኢትዮጵያ የተሰኙ ተቋማትና ድርጅቶች እንደሆኑ በመድረኩ ተገልጿል፡፡

ይህ አገር አቀፍ አመታዊ የሳይንስ ትርኢትና ውድድር በዛሬው እለት የሚጠናቀቅ ይሆናል።

በማጠናቀቂያው በሰምንቱም ዘርፎች ከ1ኛ እስከ 3ኛ ለወጡ ተወዳዳሪዎች የማበረታቻ ሽልማቶች ተሰተዋል፡፡

ይህ አገር አቀፍ አመታዊ የሳይንስ ትርኢትና ውድድር በዛሬው እለት የሚጠናቀቅ ይሆናል።

Nov 15, 2024 67

የሀገር ውስጥ ዜና

በከፍተኛ ትምህርት ተቋማት እየተተገበሩ ያሉና በቀጣይ ሊተገበሩ በእቅድ የተያዙ የሪፎርም ሥራዎች ውጤታማ እንዲሆኑ የከፍተኛ ትምህርት ተቋማት ሥራ አመራር ቦርድ አባላት ሃላፊነታቸውን እንዲውጡ ተጠየቀ።

ትምህርት ሚኒስቴር ከዩኒቨርሲቲዎች የሥራ አመራር ቦርድ አባላት ጋር በከፍተኛ ትምህርት ተቋማት የሪፎርም አተገባበርና ቀጣይ እቅዶች ዙሪያ ምክክር አካሂዷል።

በምክክር መድረኩ የትምህርት ሚኒስትሩ ፕሮፌሰር ብርሃኑ ነጋ ከፍተኛ ትምህርት ተቋማት የእውቀትና የምርምር ምንጭ እንዲሆኑ የተለያዩ የሪፎርም አጀንዳዎች ተቀርጸው ተግባራዊ እየተደረጉ መሆኑን ገልጸዋል።

ዩኒቨርሲቲዎች የአካባቢያቸውን ጸጋ ተጠቅመው የማህበረሰቡን ህይወት የመቀየርና በሁለንተናዊ ሥራዎቻቸው አርዓያ ሆነው ሊሰሩ እንደሚገባ አንስተው ይህንን ሊመጥን የሚችል የለውጥ እርምጃዎች እየተወስዱ እንደሚገኙ አብራርተዋል።

በዚህም ከፍተኛ ትምህርት ተቋማት ውጤታማ እንዲሆኑ የሥራ አመራር ቦርድ አባላት በሃላፊነትና በተጠያቂነት ስሜት ዩኒቨርሲቲዎችን ሊመሩ እንደሚገባም ጠይቀዋል።

የዩኒቨርሲቲ ሥራ አመራር ቦርድ አባላት ለሚመሩት ዩኒቨርሲቲ ስኬትም ሆነ ውድቀት ከፍተኛ ድርሻ እንዳላቸው አውቀው ሃላፊነትን መውሰድ እንደሚጠበቅባቸውም ተናግረዋል።

የከፍተኛ ትምህርት ልማት ዘርፍ ሚኒስትር ዴኤታ አቶ ኮራ ጡሹኔ በበኩላቸው ”የከፍተኛ ትምህርት ለከፍተኛ ለውጥ’’ በሚል ርዕስ እየተገበሩ ያሉ ሪፎርሞችና ቀጣይ እቅዶችን አቅርበዋል።

በዚሁ ጊዜ እንደገለጹት በሀገራችን ያሉ ዩኒቨርሲቲዎች በተሰጣቸው ተልዕኮ መሰረት ሥራቸውን እንዲሰሩ ማድረግና የተጠያቂነት ሥርዓት መዘርጋት እንደሚገባ አንስተው የዩኒቨርሲቲ ሥራ አመራር ቦርድ አባላት በየጊዜው የዩኒቨርሲቲዎችን አፈጻጸም በመገምገም ቀጣይነት ያለው ድጋፍ ማድረግ እንዳለባቸው ገልጸዋል።

በዚህም የከፍተኛ ትምህርት ተቋማት ሥራ አመራር ቦርድ አባላት አደረጃጀት በተቻለ መጠን ከተቋማት የተልዕኮ መስክ አንጻር መደገፍና መከታተል የሚችሉበትን ታሳቢ ያደረገ የሙያ ስብጥር እንዲኖረው ለማድረግም እንደሚሰራ አብራርተዋል።

በሌላ በኩል የከፍተኛ ትምህርት ተቋማት ያሉበትን ሁኔታ የሚገልጽ የድጋፍና ክትትል ሪፖርት ያቀረቡት በከፍተኛ ትምህርት ልማት ዘርፍ የመሰረተ ልማትና አስተዳደራዊ ጉዳዮች መሪ ሥራ አስፈጻሚ ሰለሞን አብርሃ (ዶ/ር) ቀደም ብለው ወደ ትግበራ የገቡ የሪፎርም ሥራዎች በተጨባጭ ለውጥ እያመጡ መሆናቸውን ጠቅሰው የቅድመ ምረቃ ተማሪዎች የመውጫ ፈተና ተማሪዎች በትምህርታቸው ላይ እንዲያተኩሩ ማድረጉን ለአብነት አንስተዋል።

በምክክር መድረኩ የተሳተፉ የከፍተኛ ትምህርት ተቋማት ሥራ አመራር ቦርድ አባላት የተለያዩ ጥያቂዎችና አስተያየቶችን አንስተው ውይይት ተድርጎባቸዋል።

በውይይቱ የከፍተኛ ትምህርት ተቋማት ሥራ አመራር ቦርድ አባላትና የዩኒቨርሲቲ ፕሬዚዳንቶች ተሳታፊ ሆነዋል።

Nov 13, 2024 75

የሀገር ውስጥ ዜና

9ኛው ሀገር አቀፍ የተማሪዎችና መምህራን የፈጠራ ሥራዎች ውድድርና አውደርዕይ ተጀመረ

9ኛው ሀገር አቀፍ የተማሪዎችና መምህራን የፈጠራ ሥራዎች ውድድርና አውደርዕይ በአዲስ አበባ ሳይንስና ቴክኖሎጂ ዩኒቨርሲቲ አስተናጋጅነት ተጀምሯል፡፡

በትምህርት ሚኒስቴር የመምህራንና ትምህርት አመራር ልማት መሪ አስፈፃሚ ዶ/ር ሙሉቀን ንጋቱ የፈጠራ ሥራዎች ውድድርና አውደርዕዩን በከፈቱበት ወቅት ውድድሩና አውደርዕዩ ተማሪዎችንና መምህራንን በማበረታታትና በማነቃቃት ለተሻለ የፈጠራ ሥራዎች ዝግጁ እንዲሆኑ ለማስቻል የሚረዳ በመሆኑ ትምህርት ሚኒስቴርም የሚያደርገውን ድጋፍና ክትትል አጠናክሮ የሚቀጥል መሆኑን ገልጸዋል።

ዶ/ር ሙሉቀን አያይዘውም መምህራንና ተማሪዎች መድረኩን ይበልጥ ለእርስ በርስ የልምድ ልውውጥ ሊጠቀሙበት እንደሚገባ ጠቅሰው የፈጠራ ሥራዎችም ወቅታዊ ችግሮችን በመፍታት ሂደት የነገይቱን ሀገራችን ችግሮች ታሳቢ ባደረገ መልኩ አቅም እየገነቡ በመሄድ ላይ ያተኮረ ሊሆን እንደሚገባም ጠቁመዋል፡፡

አገር አቀፍ የስቲም ፓወር ዳይሬከተር ዶ/ር ስሜነው ቀስቅስ በበኩላቸው የሳይንስ ትምህርቶችን በተግባር አስደግፎ በማስተማርና ከትምህርት ቤት እስከ ዩኒቨርሲቲዎች ያሉ የፈጠራ ሥራዎችን የመደገፍ ሥራ ተጠናክሮ ሊቀጥል እንደሚገባ ጠቅሰው እስከ አሁን የተሠሩ ሥራዎች ተስፋ ሰጪ እንደሆኑ በማሳያነት ሊቀርቡ የሚችሉ በአለም አቀፍ ደረጃ ተወዳዳሪ የሆኑ ተማሪዎችን ማፍራት የተቻለ መሆኑን ገልጸዋል፡፡

ዶ/ር ስሜነው አክለውም በአሁኑ ወቅት በልጽገው የምናያቸው አገሮች እዚህ ደረጃ ሊደርሱ ያቻሉበት ዋነኛው ምክንያት ለሳይንስና ቴክኖሎጂ ከፍተኛ ትኩረት ሰጥተው በመሥራታቸው እንደሆነ ጠቁመው የአገራችንን የፈጠራ ሥራዎች ይበልጥ ለማበረታታትና ውጤታማነቱንም ለመጨመር ከትምህርት ቤት እስከ አገር አቀፍ ደርጃ ያሉትን መሰል መድረኮች ከማጥናከር ጎን ለጎን በአህጉርና አለም አቀፍ ደረጃም ጭምር ለማመቻቸት ትኩረት ተሰጥቶት እየተሠራ መሆኑንም ተናግረዋል።

የሥራ ፈጠራ ውድድሩና አውደርዕዩ ለቀጣይ ሦስት ተከታታይ ቀናት የሚቆይ መሆኑም ተመላክቷል።

Nov 13, 2024 60

የሀገር ውስጥ ዜና

ትምህርት ሚኒስቴር ከሰዎች ለሰዎች ፋውንዴሽን ጋር የመግባቢያ ስምምነት ሰነድ ተፈራረመ።

ትምህርት ሚኒስቴር ከሰዎች ለሰዎች ፋውዴሽን ጋር ሦስት ልዩ አዳሪ ሁለተኛ ደረጃ ትምህርት ቤቶችን ለመገንባት የሚያስችለውን የመግባቢያ ስምምነት ሰነድ ተፈራርሟል።

የስምምነት ሰንዱን የትምህርት ሚኒስትሩ ፕሮፌሰር ብርሃኑ ነጋ እና የሰዎች ለሰዎች ፋውንዴሽን ቦርድ ሰብሳቢ ዶ/ር ሰባስቲያን ብራንዲስ ተፈራርመዋል።

በመግባቢያ ስምምነቱም ሰዎች ለሰዎች ፋውንዴሽን ሚኒስቴር መስሪያ ቤቱ ለመገንባት ካቀዳቸው 13 ልዩ አዳሪ ሁለተኛ ደረጃ ትምህርት ቤቶች መካከል ሦስቱን የሚገናባ መሆኑ ተጠቅሷል።

የልዩ አዳሪ ሁለተኛ ደረጃ ትምህርት ቤቶች ግንባታ የሚካሄድው በሀገር አቀፍ ደረጃ በተዘጋጀው አዲስ የኢትዮጵያ ትምህርት ቤቶች ግንባታ ዲዛይን መሰረት ሲሆን ሙሉ የግንባታ ወጪን በመሸፈን እንዲሁም ለመማር ማስተማር ሥራው የሚያስፈልጉ ግብዓቶችን አሟልቶ ፋውንዴሽኑ የሚያስረክብ መሆኑም ተገልጿል።

እነዚህ ትምህርት ቤቶች በአፋር፣ ሶማሌ እና ደ/ምዕራብ ኢትዮጵያ ክልሎች የሚገነቡ ሲሆን ግንባታቸውም ከ2025 እስከ 2029 እ.ኤ.አ የሚጠናቀቅ መሆኑም ተመላክቷል።

በስምምነት ሥነ ሥረዓቱ የሰዎች ለሰዎች ድርጅት ከዚህ ቀደም በርካታ ትምህርት ቤቶችን በተለያዩ የሀገራችን ክልሎች በመገንባት ለመማር ማስተማር ስራው ከፍተኛ አስተዋጻኦ ማበርከቱ ተገልጿል።

ትምህርት ሚኒስቴር በትምህርታቸው የላቀ ውጤት ያመጡና ልዩ ተሰጥኦ ያላቸው ተማሪዎች ተመርጠው የሚገቡባቸው ልዩ አዳሪ ሁለተኛ ደረጃ ትምህርት ቤቶችን በተለያዩ የሀገራችን አካባቢዎች ለመገንባት አቅዶ የተለያዩ ሥራዎችን እየሰራ መሆኑ ይታወቃል።